introdag 2012.JPG

Vejledning om uddannelse

Efterskole - Kalaallisut

Danmarkimi Kalaallit Illuutaasa suleqatigaat Oqaatsinik Pikkorissarfik/Sprogcenteret Sisimiut Danmarkimi efterskole-nut tunngatillugu.

Maani Nordjylland-mi ukiumi atuarfiusumi 07/08 tigusimavagut efterskoleriartut 37-it namminersornerullutik Oqartussaniit taperneqarlutik atuariartut. Nuna tamakkerlugu Kalaallit atuariartut 200-put.

Quppernerit ukua saaffiginniffigai atuartut, angajoqaat, ilaquttat attaveqaatit, ilinniartitsisut aammalu efterskolini ittut/ningiut.

Ilinniaqqikkusuppit?

Efterskolit allaffeqarfiat nammineq quppersakkaminni immikkoortumik Kalaallit Danmarkimut atuariartunut tunngasumik allaaserisaqarput: www.efterskole.dk

 

Efterskolertunut siunnersorti

Kalaallit danmarkimi (Region Nord) efterskolertut pillugit saaffiginninniaruit uunga saaffiginnissinnavutit:

Jonathan Johnsen

Ilinniagaqarnermut siunnersorti
Toqqaannartumik oqarasuaat: 99342563
Email: jj@dgh-aalborg.dk

 

Danmarkimi efterskolerneq

Asasagut efterskolemi atualertussat.

Danmarkimut efterskoleriarneq alloriarnerujussuuvoq. Qularnanngilaq aatsaat siullerpaajusumik angerlarsimaffiit qimallugu nuussasutit, aamma Danmarkip Kalaallit Nunaallu akornat ungaseqimmat, imaaliallaannaq angajoqqaat sapaatip akunnera naanerani pulaarfigineqarsinnaanatik, soorlu atuarfimmi kammalaatitut pisinnaanasi. Taamaammat pingaaruteqartorujussuuvoq, illit nammineq ukioq ataaseq aallarsimanissannut piareersimasutut misiginissat. Taamatut oqarsimagaanni, taava efterskolemiissimanerit inuunerni misigisimasaavoq aammalu misigisassat nutaat pissanganartut naapillugit minerungitsumillu nutaanik ikinngutitaartorneq.
  
Efterskolemi inuuneq illit angerlarsimafinniit sungiussimasanni allaaneruvoq. Siulliullugu atuarfimmi nutaamik aallartissaatit atuaqatitaallu amerlasuut akornanniilerlutit-aammalu najugaqatigissallugit! Tamatigungajak atuaqatit marlunniit-tallimat tungaat ineqatigineqartarput. Taamaattumik pingaaruteqarpoq nammineq piareersimanissaq inuppassuarnik ilinniagaqarnissaq, illillu nammineq piumassutsinnik inunnik kammalaatinik nutaanik ujartuinissat. Aamma imaassinnaavoq kantine-mi ullut ilaanni illit mamarinngisannik sallaassisut.
 
Eqqaamasassap pingaarutillip aapparaa, efterskole-miinnermi atuariartortarnissaq! Allatut oqaatigalugu ilimagineqarpoq illit nammineerlutit ullaakkut makittarnisssat, ilinniartitaanerni malinnaassasutit, akunnerni ilinniartitsiffiusuni peqataassasutit, ilinniagassatit suliarissagitit, suliasiisutillu naamassisat tunniutissagitit. Atuarfimmi suliassat nalinginnaasut avataatigut allanik efterskole-mi sammisassaqartarpoq, soorlu namminerisamik toqqakkamik sammisaqarneq, illit soqutiginerpaasarnik suliaqarlutit! 
 
Pingaaruteqarpoq attaveqaatitut ilaquttat atalluarfiginissai. Taakkunani ittussaagavit sapaatip akunnera naanerani aammalu feeriarfinni. Taamaattumi k  attaveqaatitut ilaquttatit ataqqissavatit. Eqqaamallugu taakkua angerlarsimaffianni pulaartuugavit, eqqaamallugulu aggernialeruit sianerfigissagakkit.  Attaveqaatitut ilaquttat ikiortassavatit, nerisassiornermi, erruvinermi suliassanilu allani. Attaveqaatitit pisussaanngillat arlaatigut akiliutissallutit, illit nammineq isumagisassaraat soorlu bus-mut akiliutissat.
 
Angerlarsimaffik ungaseqisoq qimassimagaanni, pissusissamisuuginnarpoq angerlarsertarneq. Uvagut oqartarpugut piffissani ukunani pingasuni efterskoleriartut angerlarsernerusartut. Siullermik efterskolerluni aallarteqqaarnermi, suli ilisarisimasaqannginnamik, aamma suli sungiussimanagu angerlarsimaffiup qimannera. Kisianni inissilluareeraanni ilinniaqatillu ilikkaleraanni, angerlarsertarneq annikilliartortarpoq. Aappaatut, ukioq qanilliartuleraangat, sila taarsisalerluni, siallerajussilluni Danmarki qasersigaangat, Kalaalit nunaata issinga aput sikulu maqaasinarsisarpoq. Pingajussaani juullilersillugu. Efterskolertut ilaat juullisioriartorlutik angerlartarput, uteqqikkaangamillu paasinartumik ilaquttaminnik maqaasisarlutik. Ilaat Danmarkimi ilaquttaminni imaluunniit attaveqatiminni juullisiortarlutik, taamatullu ilaquttatik maqaasisarlugit.
 
Angerlarsertarneq, kikkulluunniit misilittarpaat tassalu aamma piviusuugami ajunngitsoq. Angerlarseraannimi taava isumaqarpoq angerlarsimaffimmi asaneqarsimaneq, namminerlu ilaquttanut asanninneq. Namminerli suliuniuteqaruit qularissanngilat efterskolernerit misigisaqarfigilluarumaarit puigunaatsumik aammalu misigisassasavit annertut ilagissavaat ulloq kingulleq efterskole qimalerukku, ikinngutitaatit inuulluaqqunialerukkit.
 
Qilanaaraarput Nordjylland-mi efterskole-ni takunissat.

 

Atuarfimmik toqqaaneq aamma tapiutit

Namminersornerullutik oqartussaninngaanniit tapertinniaraanni qinnuteqarfissaq Danmarkimi efterskolerniaraanni kingusinnerpaamik 1. December tunniutereersimassaaq. Danmarkimi efterskolernemi tapertinniaraanni arlalinnik piumasaqaateqartarpoq:

  • Atuartoq aallartinnermini meeqqat atuarfiat naammasereersimassavaa aamma suli 18-nik ukioqalersimassanngilaq.
  • Qinnuteqarnermi efterskole-mi inissamik pisimanermut qulakkiisimanermut uppernarsaat ilanngunneqassaaq.
  • Isumaqatigiissummik atsiornilimmik Danmarkimi attaveqaateqarffissat atsiugaannik.


Nalunaarut aamma qinnuteqarnermut taperneqarnissamullu immersugassaq ujaruk, attaveqaatinut isumaqatiigiissut, angajoqqaat misissugassaat aamma ilinniartitsisut siunnersortit allallu uvani Sprogcenterets/oqaatsitnik Pikkorissarfiup quppersagaani: www.oqaatsit.gl.

Danmarkimi efterskolerusuttut ammerlasaqaat. Taamaattumik pingaaruteqarpoq atuarniartoq piaartumik inissaanik ujarliutissallugu. Allattitoqarsinnaavoq ukiut arlallit sioqqullugit qularnaveeqqutinik akiliilluni.

Patajaattumik efterskolessamik toqqaassaasi. Atuarfiit amerlasuut assigiinngitsunik neqerooruteqartarput toqqagassanik soorlu nipilersorneq, timersorneq, isiginnaartitsineq, assassorneq, silami inuuneq, IT il. il.. Atuarfiit arlallit aalajangersimasunik toqqammaveqartarput inooriaatsit tungaasigut, soorlu upperisarsiortut (indremissionsk), Økologisk imaluunniit naatitaannarnik nerisallit. Ilaat neqerooruteqartarput immikkoortumik atuartumut ilinniarnerminik ajornartorsiutilimmut ilinniartitseriaatsimik aammalu naqinnernik tappiissusilinnut, imaluunniit qallunaatut ilinniartitaaneq oqaatsit aappaatut. Atuarfiit quppersagaanni annertunerusumik atuarneqarsinnaapput atuarfinnut tunngasut suullu naleqarnerutitaralugit ingerlattineri.

Efterskolelissat naniuk: www.efterskole.dk'

 

Attaveqaatit ilaqutariit

Namminersornerullutik Oqartussaniit tapiissutinik pisinnaanermut piumasaqaataavoq, atuartoq attaveqaatinik ilaqutariinik Danmarkimi peqarnissaq. Taamatut pissutigalugu pingaartorujussuummat efterskole-mi atuartoq Danmarkimi efterskolernermini toqqammaveqarluarnissaa.

Innersuutigaarput aattaveqaatitut ilaqutassat sapinngisamik ilaqutarissagisi imaluunniit ilisarisimassagisi Danmarkimi najugallit, atuartullu nalunngeriigai. Taassuma saniatigut isumassatsialaavoq efterskole toqqagaq attaveqaatinut ungasippallaannginnissaa, bus-serluni imaluunniit qimuttuitsorluni angalaneq toqqagaq akisusinnaasarmat, atuartup attaveqaatini akulikitsunik takussagunigit.

Attaveqaatit angajoqqaat sinnerlugit pisussaagaluartut, meeqqat efterskolerluni Danmark-miinnerani, pingaaruteqarpoq eqqaamassallugu angajoqqaajusut meeqqaminnut akisussaaffik tigummiarmassuk-aammalu aningaasaqarniarnerup tungaatigut.

Maleruagassat uvani atuakkit: www.oqaatsit.gl

Atuartup attaveqaatillu akornanni ajornartorsiulissagussi Kalaallit Illuani ilinniartunut siunnersortit attavigineqarsinnaapput oqrasuaat atorlugu: 98 14 68 00

 

Kalaallit Illuata akisussaaffii

Kalaallit Illuat arlalinnik akisussaaffeqarpoq Danmarkimi afterskolernermut atatillugu.

  • Danmarkimut apuunnermi efterskoleriartut attaveqaatiminnik aaneqarsimanngitsut Kalaallit Illuani sulisunik aaneqartarput. Kalaallit Illuat København-miittup isumagisarpaat atuartut Kastrup mittarfiani tigunissaat, ingerlaffissaanullu nassiuteqqittarlugit. Tulliuttutut efterskoleriartut atuarfissaminnut tunniukkiartorneqartarput attaveqaatiminnik imaluunniit Illuniit.
  • Ukioq atuarfissap aallaqqaataata missaani Kalaallit Illuat atuartut ilinniartitsisullu attaveqaatit qaaqqusarpai efterskolertut ataatsimoortillugit. Tassani periarfissaavoq kammalaatit ilisarisimasallu naapeqqissallugit, imminnullu atualernermi misigisimasat eqqartorlugit.
  • Ukiornerani Kalaallit Illuutaaniit siunnersuisoqassaaq atuartup siunissami ilinniagaqarnissaa pillugu efterskole suleqatigalugu.
  • Atuartoq angerlaqqilerpat Kalaallit Illuata billittinik inniminniineq isumagissavaa. Inniminniinissamut immersugassaq upernarpat efterskolinut nassiunneqassapput.
  • Pisariaqartinneqaraangatta aggertarpugut. Atuartoq pisariaqartittippat soorlu angerlarserneq peqqutigalugu imaluunniit allanik ajornatorsiuteqarpat, efterskolernerup ingerlanerani Illumi ilinniartunut siunnersortit aamma inunnik siunnersorti piareersimapput.
  • Illu tamatigut nalunaarfigineqartassaaq efterskole-mut allamut nuuttoqarniarpat imaluunniit ilaquttat attaveqaatit taarserneqassappata.
  •  Uvagut e-mail-erput telefon-gullu apeqquteqarfiginissaminnut ammaannarput, atuartunut, angaajoqqaanut attaveqaatitut ilaquttanut imaluunniit efterskolinut.

 

Efterskolinut

Efterskole-nut suleqataalluarusuppugut. Efterskolernerup ingerlanerani ajornartorsiortoqalissappat isumassatsialaavoq Illu piaartumik attavigigussiuk. Tamatigut kalaallisut oqaloqateqarneq iluaqutaasarmat. Pisariaqartillugu uvagut takkussinnaavugut!

Atuartoq efterskolernermini allanngortitsissappat soorlu ilaquttat attaveqaatit imaluunniit efterskole-mut allamut nuussappat ukua attavigisigit ilinniartunut siunnersortit.

Atualernerup aallaqqaataata tungaani Kalaallit Illuat atuartunik attaveqaatitullu ilinniartitsisunik qaaqqusisarpoq efterskolertut katerisimaartillugit. Tassani atuartunut periarfissatsialaavoq kammalaatit naapeqqissallugit aammalu atualeqqaarnermi misigisimasat eqqartulaassallugit. Aammalu efterskole-ni attaveqaatitut ilinniartitsisunut periarfissatsialaalluni misilittakkat oqallisiginissaanik atuarfimmi kalaallinik atuartuuteqarneq. Kalaallit Illuaniit peqataassapput ilinniartunut siunnersortit aammalu inuleriffimmi siunnersorti najuutissapput atuartut ilinniartitsisullu apeqquteqarusuppata piareersimassallutik.

Ilanngullugulu ukiornerata ingerlanerani atuarfinnut ornigutissalluta efterskole-reernerup kingorna ilinniaqqinnissamut toqqaanissaq paasitikkiartorlugu.

Malugiuk Illut eqqarisaani isumagisassat allanngornikuummata kommune-it kattunnerannut atatillugu. Tamanna efterskole-nut Viborg Amt-unikuusumut sunniutigissavaa, siunissami Århus-mut Kalaallit Illuanut atalissagamik. Takujuk Kalaallit Illuutaasa eqqarisaani korti una tooroq.

 

Atuagaaraq - Danmarkimi efterskolerneq

Danmarkimi efterskolernermi paasissutissat katersorsimavugut quppersakkami uvani: Danmarkimi efterskolerneq.

Atuagaaraq anisiguk ugguna